سیالکوٹ۔ 05 اکتوبر (اے پی پی):سیالکوٹ عوامی شکایات کے فوری ازالے اور شہریوں کو صاف ستھرا ماحول فراہم کرنے کے لیے ضلعی انتظامیہ سیالکوٹ کی جانب سے صفائی آپریشن جاری ہے۔ علاقہ مکینوں کی جانب سے صفائی کی صورتحال سے متعلق موصول ہونے والی شکایت کا فوری نوٹس لیتے ہوئے ڈپٹی کمشنر سیالکوٹ اویس مشتاق کی ہدایت پر ایم ڈی ستھرا پنجاب ایجنسی سیالکوٹ آصف اقبال کی نگرانی میں متعلقہ علاقوں میں خصوصی کلین اَپ آپریشن کیا گیا۔ ستھرا پنجاب ایجنسی کی ٹیموں نے حمزہ غوث، سنیارے والہ پل، محلہ سلطان پورہ اور ظہورہ کے علاقوں میں فوری کارروائی کرتے ہوئے صفائی کے انتظامات کا جائزہ لیا اور مختلف مقامات پر موجود کوڑا کرکٹ، گندگی اور دیگر صفائی کے مسائل کو دور کیا۔ صفائی عملہ اور متعلقہ مشینری کو موقع پر متحرک کرتے ہوئے متاثرہ مقامات کی صفائی مکمل کی گئی اور علاقے کو صاف ستھرا بنا دیا گیا۔ ایم ڈی ستھرا پنجاب ایجنسی سیالکوٹ آصف اقبال نے متعلقہ عملے کو ہدایت کی کہ شہریوں کی جانب سے موصول ہونے والی صفائی سے متعلق شکایات پر فوری کارروائی کو یقینی بنایا جائے اور کسی بھی علاقے میں صفائی کی صورتحال خراب ہونے کی صورت میں بروقت اقدامات کیے جائیں۔ انہوں نے کہا کہ شہریوں کو صاف ستھرا ماحول فراہم کرنا ستھرا پنجاب ایجنسی کی اولین ترجیحات میں شامل ہے اور صفائی کے نظام کو مزید مؤثر بنانے کے لیے فیلڈ میں نگرانی کا عمل بھی جاری رکھا جائے گا۔ اس موقع پر علاقہ مکینوں نے صفائی کی شکایت پر فوری کارروائی کرنے اور علاقے کی صفائی یقینی بنانے پر ڈپٹی کمشنر سیالکوٹ اویس مشتاق، ایم ڈی ستھرا پنجاب ایجنسی آصف اقبال اور متعلقہ صفائی عملے کا شکریہ ادا کیا۔ ضلعی انتظامیہ کی جانب سے شہریوں سے بھی اپیل کی گئی ہے کہ وہ اپنے علاقوں میں صفائی برقرار رکھنے میں انتظامیہ کا ساتھ دیں، کوڑا کرکٹ مقررہ مقامات پر ڈالیں اور صفائی سے متعلق کسی بھی مسئلے یا شکایت سے متعلقہ حکام کو بروقت آگاہ کریں تاکہ فوری کارروائی کو یقینی بنایا جا سکے۔
بشکریہ: اے پی پی (ایسوسی ایٹڈ پریس آف پاکستان)
