اسلام آباد۔3اکتوبر (اے پی پی):ضلعی انتظامیہ اسلام آباد کی جانب سے ماحول دشمن پولی تھین بیگز کے خلاف کارروائیوں کا سلسلہ دوسرے روز بھی جاری رہا، مختلف علاقوں میں پابندی کی خلاف ورزی پر مجموعی طور پر 122 افراد کو گرفتار جبکہ 293 کلو گرام پلاسٹک بیگز ضبط کر لیے گئے۔ضلعی انتظامیہ کے مطابق مسلسل خلاف ورزی کرنے والی 7 دکانیں بھی سیل کر دی گئیں۔
اسسٹنٹ کمشنر نیلور نے 15، اسسٹنٹ کمشنر رورل نے 22، سب ڈویژن سیکرٹریٹ میں 10 جبکہ سٹی میں 20 افراد کو گرفتار کیا۔اسی طرح اسسٹنٹ کمشنر انڈسٹریل ایریا نے 7، اسسٹنٹ کمشنر شالیمار نے 8 جبکہ اسسٹنٹ کمشنر صدر نے 30 افراد کو گرفتار کیا جبکہ اسسٹنٹ کمشنر پوٹھوہار کی جانب سے بھی متعدد افراد کو حوالات منتقل کیا گیا۔
ضلعی انتظامیہ نے کہا ہے کہ اسلام آباد میں ماحول دشمن پولی تھین بیگز کے استعمال پر سخت قانونی کارروائی عمل میں لائی جائے گی۔ ڈپٹی کمشنر اسلام آباد نے پلاسٹک بیگز پر عائد پابندی پر ہر صورت عملدرآمد یقینی بنانے کی ہدایت کی ہے۔
بشکریہ: اے پی پی (ایسوسی ایٹڈ پریس آف پاکستان)
