لاہور۔2اکتوبر (اے پی پی):فیفاآسیان کپ میں ویتنام نے پاکستان کو 4-2 سے شکست دیدی، تفصیل کے مطابق پاکستان نے FIFA آسیان کپ میں اپنے آخری میچ میں ویتنام کے خلاف بھرپور مزاحمت کی، تاہم اسے 4-2 سے شکست کا سامنا کرنا پڑا، جس کے ساتھ ہی قومی ٹیم کی ٹورنامنٹ میں مہم ایک پوائنٹ کے ساتھ اختتام پذیر ہوگئی۔
نولبرٹو سولانو کی زیرِ قیادت پاکستان نے پہلے ہاف میں عمدہ کھیل پیش کیا اور 31ویں منٹ میں محب اللہ کے شاندار گول کی بدولت برتری حاصل کرلی۔ محب اللہ نے ویتنامی دفاع سے گیند چھین کر گول کیپر پیٹرک گیانگ لے کو مات دی اور گیند جال میں پہنچا دی۔ پاکستان نے وقفے تک اپنی ایک گول کی برتری برقرار رکھی۔دوسرے ہاف کے آغاز میں سولانو نے عالمگیر غازی اور عمر نواز کو میدان میں اتارا، تاہم ویتنام نے تیزی سے کھیل کا رخ تبدیل کردیا۔ 50ویں منٹ میں لانگ ہائی نگوین نے گول کرکے مقابلہ برابر کیا، جبکہ سات منٹ بعد ڈک ہوانگ نگوین نے دوسرا گول کرکے ویتنام کو 2-1 کی برتری دلا دی۔پاکستان نے برابر ی کی کوشش جاری رکھی، تاہم عبدالصمد شہزاد کا شاٹ بلاک ہوگیا جبکہ عبدالصمد خان کے کراس پر عمر نواز کا ہیڈر بھی گول میں تبدیل نہ ہوسکا۔ 80ویں منٹ میں بیک ڈنھ نگوین نے ویتنام کی برتری 3-1 کردی۔
پاکستان نے آخری لمحات تک مقابلہ جاری رکھا اور 88ویں منٹ میں علی اکبر کے شاٹ پر کلیم اللہ خان نے فیصلہ کن ٹچ دے کر گیند جال میں پہنچا دی، جس سے پاکستان نے ایک بار پھر واپسی کی امید پیدا کردی۔ تاہم اختتامی لمحات میں بیک ڈنھ نگوین کے پاس پر ہوانگ منہ ولیمز نے چوتھا گول کرکے ویتنام کی 4-2 سے کامیابی یقینی بنا دی۔پاکستان نے اس سے قبل فلپائن کے خلاف دو گول کے خسارے سے واپسی کرتے ہوئے 2-2 سے میچ برابر کیا تھا۔ ویتنام عالمی رینکنگ میں پاکستان سے 99 درجے اوپر ہے۔ گروپ مرحلے کے اختتام پر تھائی لینڈ پہلے، ویتنام دوسرے اور فلپائن تیسرے نمبر پر رہا، جبکہ پاکستان نے ایک پوائنٹ کے ساتھ اپنی پہلی FIFA مقابلے کی مہم مکمل کی۔
بشکریہ: اے پی پی (ایسوسی ایٹڈ پریس آف پاکستان)
