اسلام آباد۔7اکتوبر (اے پی پی):فیڈرل بورڈ آف انٹرمیڈیٹ اینڈ سیکنڈری ایجوکیشن (ایف بی آئی ایس ای) اسلام آباد نے الحاق شدہ اداروں کی درخواستوں کے جواب میں تمام الحاق شدہ اداروں کے لیے ایچ ایس ایس سی سطح پر رجسٹریشن ریٹرنز جمع کرانے کی آخری تاریخ میں 30 اکتوبر 2026ء تک توسیع کر دی ہے۔یہ توسیع وفاقی وزیر برائے تعلیم و پیشہ وارانہ تربیت ڈاکٹر خالد مقبول صدیقی کی ہدایت اور خصوصی مداخلت کے تحت کی گئی ہے۔
اس اقدام کا مقصد خاص طور پر آزاد جموں و کشمیر (اے جے کے) کے الحاق شدہ اداروں اور دیگر الحاق شدہ اداروں کو درپیش ان مشکلات کا ازالہ کرنا ہے جو انہیں پہلے سے مقررہ مدت کے اندر رجسٹریشن کا عمل مکمل کرنے میں پیش آ رہی تھیں۔ وفاقی وزیر نے رجسٹریشن کے تقاضوں کو مکمل کرنے کے لیے اضافی وقت دے کر اداروں اور طلباء کی سہولت کاری کا فیصلہ کیا ہے۔اب رجسٹریشن ریٹرنز عام فیس کے ساتھ 30 اکتوبر 2026ء تک جمع کرائے جا سکتے ہیں۔ اس سلسلے میں فیڈرل بورڈ کی جانب سے تمام اداروں کو ایک نظرثانی شدہ نوٹیفکیشن بھی جاری کیا جا رہا ہے۔تمام الحاق شدہ اداروں کے سربراہان سے گزارش ہے کہ وہ توسیع شدہ مہلت سے فائدہ اٹھائیں اور اس بات کو یقینی بنائیں کہ تمام اہل طلبہ کے رجسٹریشن ریٹرنز کی کارروائی مکمل کر کے انہیں مقررہ وقت کے اندر جمع کرایا جائے۔
اداروں کو یہ بھی ہدایت کی جاتی ہے کہ وہ اس بات کو یقینی بنائیں کہ رجسٹریشن ریٹرنز میں فراہم کردہ معلومات مکمل، درست اور ایف بی آئی ایس ای کے متعلقہ قواعد و ضوابط کے عین مطابق ہوں۔رجسٹریشن کے عمل، اہلیت کے معیار، متعلقہ طریقہ کار اور دیگر امور کے بارے میں مزید رہنمائی اور وضاحت کے لیے، اداروں کے سربراہان کو مشورہ دیا جاتا ہے کہ وہ موجودہ تعلیمی سیشن کے لیے ایچ ایس ایس سی سطح پر جاری کردہ رجسٹریشن کا ابتدائی نوٹیفکیشن ملاحظہ کریں۔تمام متعلقہ اداروں سے گزارش ہے کہ وہ تاریخ میں کی گئی اس توسیع کو نوٹ کریں اور اسی کے مطابق رجسٹریشن کا عمل مکمل کریں۔ کسی بھی قسم کے سوالات یا مشکلات کی صورت میں ایف بی آئی ایس ای کے متعلقہ حکام سے رابطہ کیا جا سکتا ہے۔
بشکریہ: اے پی پی (ایسوسی ایٹڈ پریس آف پاکستان)
