اسلام آباد۔2اکتوبر (اے پی پی):صومالیہ کے ساحل کے قریب ہائی جیک ہونے والے ایم وی آنر 25 کے پاکستانی عملے کے 4 ارکان کو بحفاظت بازیاب کرا لیا گیا۔
جمعہ کو سماجی رابطے کی ویب سائٹ ایکس پر ایک بیان میں نائب وزیراعظم و وزیر خارجہ سینیٹر محمد اسحاق ڈار نے کہا کہ وزارت خارجہ اور جبوتی میں پاکستانی سفارتخانے کی مسلسل کوششوں کے نتیجے میں صومالیہ کے ساحل کے قریب ہائی جیک ہونے والے ایم وی آنر 25 کے متاثرہ دس پاکستانی عملے کے ارکان میں سے چار یاسر خان، عقیل خان، امین بن شمس اور عثمان غنی کو بحفاظت بازیاب کرا لیا گیا ہے اور ان کے 3 اکتوبر کو کراچی پہنچنے کی توقع ہے۔
انہوں نے کہا کہ تین پاکستانی عملے کے ارکان مرحوم رفیع اللہ خان، مرحوم سید کاشف عمر اور مرحوم محمود احمد انصاری جو افسوسناک طور پر اپنی جانوں سے ہاتھ دھو بیٹھے، کے جسد خاکی پاکستان واپس لائے جا رہے ہیں، اس سلسلے میں تمام ضروری قانونی اور دیگر ضابطہ جاتی کارروائیوں کو تیز رفتاری سے مکمل کیا جا رہا ہے تاکہ اس عمل کو جلد از جلد مکمل کیا جا سکے، سوگوار خاندانوں سے دلی تعزیت کا اظہار کرتا ہوں جو اس انتہائی تکلیف دہ وقت سے گزر رہے ہیں۔
‘انہوں نے کہا کہ باقی پاکستانی عملے کے تین ارکان عمران علی، یاسین محمد اور سید یوسف حسین کپتان کے ہمراہ بدستور جہاز پر موجود ہیں، ہم ان کی بحفاظت بازیابی اور جلد از جلد وطن واپسی کے لیے دوست ممالک کے ساتھ فعال طور پر رابطہ اور تعاون کر رہے ہیں۔ اسحاق ڈار نے کہا کہ وزیر اعظم شہباز شریف کی قیادت میں وزارت خارجہ اس معاملے پر پوری طرح توجہ دیئے ہوئے ہے اور تمام پاکستانی شہریوں بشمول جاں بحق افراد کے جسد خاکی کی جلد از جلد واپسی یقینی بنانے کے لیے مسلسل ہرممکن کوشش کر رہی ہے اور متاثرہ خاندانوں کو ہرممکن تعاون فراہم کرتی رہے گی۔
بشکریہ: اے پی پی (ایسوسی ایٹڈ پریس آف پاکستان)
