راولپنڈی۔17نومبر (اے پی پی):ایران کے وزیر خارجہ عباس عراقچی کی قیادت میں اعلیٰ سطح کے وفد نے چیف آف آرمی سٹاف و چیف آف ڈیفنس فورسز فیلڈ مارشل سید عاصم منیرسے ملاقات کی جس میں باہمی دلچسپی کے امور، علاقائی سلامتی کی صورتحال اور بدلتی ہوئی جغرافیائی و سیاسی پیش رفت پر تفصیلی تبادلہ خیال کیا گیا۔
پاک فوج کے شعبہ تعلقات عامہ (آئی ایس پی آر)سے جاری بیان کے مطابق ملاقات کے دوران فریقین نے مشترکہ سکیورٹی چیلنجز سے نمٹنے کے لیے باہمی تعاون کے مواقع تلاش کرنے پر بھی گفتگو کی۔اس موقع پر چیف آف آرمی سٹاف و چیف آف ڈیفنس فورسز نے خطے میں پائیدار امن و استحکام کے فروغ کے لیے دونوں برادر ممالک کے درمیان مسلسل روابط، باہمی اعتماد اور قریبی ہم آہنگی کی اہمیت پر زور دیا۔
ایرانی وزیر خارجہ نے خطے میں امن و استحکام کے قیام کے لیے پاکستان کے تعمیری کردار کو سراہا اور دوطرفہ تعلقات کو مزید مستحکم بنانے کے لیے اپنے ملک کی خواہش کا اظہار کیا۔
بشکریہ: اے پی پی (ایسوسی ایٹڈ پریس آف پاکستان)



