اسلام آباد۔4اکتوبر (اے پی پی):پاکستان میں ہر 9 میں سے ایک خاتون کو چھاتی کے سرطان کا خطرہ ہے، ملک میں تقریباٌ ایک کروڑ 20 لاکھ خواتین کو چھاتی کے کینسر کا خدشہ ہےاور سالانہ 90 ہزار کیس رپورٹ ہوتے ہیں جبکہ 40 ہزار خواتین زندگی کی بازی ہار جاتی ہیں۔
معروف طبی ماہر ڈاکٹر آصف چنڑ نےچھاتی کے کینسر سے آگاہی کے مہینہ کے حوالے سے کہا ہے کہ چھاتی کا کینسر چھاتی کے خلیوں سے بنتا ہے اور یہ مردو خواتین میں ہو سکتا ہے تاہم خواتین میں اس بیماری کا تناسب زیادہ ہے۔
انہوں نے کہا کہ گزشتہ تین دہائیوں کے دوران دنیا بھر میں 50 سال سے کم عمر افراد میں کینسر کی بیماری تیزی سے پھیل رہی ہے اور اس دوران سب سے زیادہ تشخیص چھاتی کے سرطان کی ہوئی ہے۔ ڈاکٹر آصف چنڑ نے کہا کہ اسی وجہ سے آگہی کیلئے ایک ہفتہ نہیں بلکہ اکتوبر کا پورا مہینہ مختص کیا گیا ہے ۔
انہوں نے مزید کہا کہ چھاتی کے کینسر کے 66 فیصد مریضوں کی تشخیص 55 سال کی عمر کے بعد ہوتی ہے تاہم بیماری کی ابتدائی سٹیج پر تشخیص سے چھاتی کے کینسر پر قابو پایا جا سکتا ہے۔ انہوں نے کہا کہ چھاتی کے سرطان کے حوالہ سے عوامی شعور کا فروغ وقت کی اہم ضرورت ہے۔
بشکریہ: اے پی پی (ایسوسی ایٹڈ پریس آف پاکستان)
