اسلام آباد۔2اکتوبر (اے پی پی):ملکی برآمدات میں جاری مالی سال کی پہلی سہ ماہی کے دوران سالانہ بنیادوں پر 11 فیصد جبکہ درآمدات میں 13 فیصد اضافہ ریکارڈ کیا گیا ہے، مالی سال کی پہلی سہ ماہی میں تجارتی خسارہ کاحجم 10.79 ارب ڈالر رہا۔
پاکستان بیورو برائے شماریات کے اعداد و شمار کے مطابق مالی سال کی پہلی سہ ماہی میں ملکی برآمدات کا حجم 8.40 ارب ڈالر رہا جو گزشتہ مالی سال کی اسی مدت کے 7.59 ارب ڈالر کے مقابلے میں 11 فیصد زیادہ ہے۔ستمبر میں برآمدات 2.93 ارب ڈالر ریکارڈ ہوئیں جو اگست کے 2.53 ارب ڈالر کے مقابلے میں 16 فیصد جبکہ گزشتہ سال ستمبر کے 2.49 ارب ڈالر کے مقابلے میں 18 فیصد زیادہ ہیں۔اعداد و شمار کے مطابق پہلی سہ ماہی میں ملکی درآمدات 19.21 ارب ڈالر رہیں جو گزشتہ مالی سال کی اسی مدت میں 16.97 ارب ڈالر تھیں، یوں درآمدات میں سالانہ بنیادوں پر 13 فیصد اضافہ ہوا۔
ستمبر میں درآمدات 6.49 ارب ڈالر ریکارڈ ہوئیں جو اگست کے 5.80 ارب ڈالر کے مقابلے میں 12 فیصد اور گزشتہ سال ستمبر کے 5.84 ارب ڈالر کے مقابلے میں 11 فیصد زیادہ ہیں۔اس طرح مالی سال کی پہلی سہ ماہی میں پاکستان کا تجارتی خسارہ 10.79 ارب ڈالر ریکارڈ کیا گیا جو گزشتہ مالی سال کی اسی مدت کے 9.73 ارب ڈالر کے مقابلے میں 15 فیصد زیادہ ہے۔ستمبر میں تجارتی خسارہ 3.55 ارب ڈالر رہا جو اگست کے 3.29 ارب ڈالر کے مقابلے میں 8 فیصد اور گزشتہ سال ستمبر کے 3.34 ارب ڈالر کے مقابلے میں 6 فیصد زیادہ ہے۔
بشکریہ: اے پی پی (ایسوسی ایٹڈ پریس آف پاکستان)
