کراچی۔ 05 اکتوبر (اے پی پی):کورنگی ایسوسی ایشن آف ٹریڈ اینڈ انڈسٹری (کاٹی) کے صدر شیخ عمر ریحان اور مجلس عاملہ نے معروف صنعت کار، تاجر رہنما اور کاٹی و یونائیٹڈ بزنس گروپ (یو بی جی) کے سرپرستِ اعلی ایس ایم تنویر کو وفاق ایوان ہائے صنعت و تجارت پاکستان (ایف پی سی سی آئی) کے انتخابات برائے سال 2027تا 2028 کی مدت کیلئے صدر نامزد کردیا۔پیر کو جاری اعلامیہ کے مطابق صدر کاٹی نے کہا کہ ایف پی سی سی آئی ملک کے صنعت کاروں، تاجروں، برآمد کنندگان اور کاروباری اداروں کی ایک اہم نمائندہ تنظیم ہے، اس لیے اس کی قیادت کو معیشت کے حقیقی مسائل اور زمینی حقائق سے مکمل طور پر ہم آہنگ ہونا چاہیے۔
کاٹی کے ڈپٹی پیٹرن ان چیف زبیر چھایا نے کہا کہ کاٹی ایس ایم تنویر کی صدارتی امیدوار کی مکمل اور بھرپور حمایت کرتی ہے۔ ہمیں امید ہے کہ ایف پی سی سی آئی کی صدارت کے اعلی ترین عہدے پر فائز ہو کر وہ نہ صرف پاکستان کی تاجر برادری کے درپیش مسائل کو بڑے پیمانے پر حل کرنے بلکہ بین الاقوامی سطح پر بھی پاکستان کے صنعتی و تجارتی وقار کو نیا افق فراہم کریں گے۔اجلاس کے شرکاء نے ایس ایم تنویر کی کاروباری برادری کیلئے خدمات کو خراجِ تحسین پیش کیا۔ کاٹی کی قیادت اور ایگزیکٹو کمیٹی کے اراکین نے ملک بھر کے تمام چیمبرز آف کامرس اور ایسوسی ایشنز سمیت یو بی جی کے تمام قائدین سے اپیل کی کہ ایس ایم تنویر کو کثرت رائے سے کامیاب کراکے بزنس کمیونٹی کی دیرینہ خواہش کو پورا کیا جائے۔
اجلاس میں کاٹی کے پیٹرن ان چیف ایس ایم تنویر، ڈپٹی پیٹرن ان چیف زبیر چھایا، سینئر نائب صدر سید فرخ قندھاری، نائب صدر ناصر شیخ، یو بی جی کے رہنما زبیر طفیل، خالد تواب، ممبر قومی اسمبلی مرزا اختیار بیگ، میاں زاہد حسین،عبدلمہیمن خان ، شوکت احمد، اکرام راجپوت ، مسعود نقی، سلیم الزماں، فرحان الرحمان، شیخ منظر عالم، جوہر قندھاری، جنید نقی، احتشام الدین، حنیف گوھر، نورخان، کاٹی کے سابق صدور، مجلس عاملہ کے اراکین اور کاروباری برادری کے نمائندگان نے شرکت کی۔
بشکریہ: اے پی پی (ایسوسی ایٹڈ پریس آف پاکستان)
