اسلام آباد۔2اکتوبر (اے پی پی):سپیکر قانون ساز اسمبلی آزاد کشمیر چوہدری طارق فاروق نے آزاد جموں و کشمیر کونسل کے بلا مقابلہ منتخب ہونے والے چار اراکین کو مبارکباد پیش کرتے ہوئے کہا ہے کہ ان کا بلا مقابلہ انتخاب ان کے طویل سیاسی سفر، پارلیمانی تجربے، عوامی خدمات اور سیاسی بصیرت کا اہم اعتراف ہے۔جمعے کو یہاں جاری بیان میں انہوں نے کہا کہ چوہدری لطیف اکبر، چوہدری محمد سعید، راجہ مشتاق احمد منہاس اورچوہدری منظور احمد کو اپنی اور آزاد جموں و کشمیر قانون ساز اسمبلی کی جانب سے دلی احترام اور قلبی مسرت کے ساتھ تہہ دل سے مبارکباد پیش کرتا ہوں۔
انہوں نے کہا کہ ان ارکان کا بلا مقابلہ انتخاب ان کے طویل سیاسی سفر، پارلیمانی تجربے، عوامی خدمات اور سیاسی بصیرت کا اہم اعتراف ہے،یہ امر مزید باعثِ افتخار ہے کہ چاروں منتخب اراکین نہ صرف پختہ کار اور تجربہ کار پارلیمنٹرین ہیں بلکہ انہوں نے اپنی سیاسی زندگی کا بڑا حصہ آزاد جموں و کشمیر کے عوام کی خدمت، جمہوری اقدار کے فروغ اور پارلیمانی اداروں کی مضبوطی کے لیے وقف کیا ۔انہوں نے کہا کہ مجھے کامل یقین ہے کہ ان کا وسیع سیاسی و پارلیمانی تجربہ آزاد جموں و کشمیر کونسل کے وقار، مؤثریت اور آئینی کردار کو مزید مستحکم بنانے میں معاون ثابت ہوگا،توقع ہے کہ وہ آئین و قانون کی بالادستی، اچھی طرزِ حکمرانی، پائیدار ترقی، ادارہ جاتی استحکام اور عوامی فلاح و بہبود کے مقاصد کے حصول کے لیے اپنی صلاحیتوں اور تجربے کو بروئے کار لائیں گے۔
طارق فاروق نے کہا کہ آزاد جموں و کشمیر کے عوام اور پاکستانی عوام کے درمیان قائم تاریخی، نظریاتی، فکری اور آئینی رشتوں کو مزید مستحکم اور بامعنی بنانے کے لیے بھی ان اراکین کی دانش مندانہ رہنمائی اور فعال کردار نہایت اہم ہوگا۔سپیکر اسمبلی نے کہا کہ مجھے امید ہے کہ آزاد جموں و کشمیر کونسل، چیئرمین کونسل وزیراعظم پاکستان محمد شہباز شریف کی سربراہی اور وزیرِ امورِ کشمیر و گلگت بلتستان و انچارج آزاد جموں و کشمیر کونسل سیکرٹریٹ امیر مقام کی نگرانی میں آزاد جموں و کشمیر کے عوام کی خدمت، ریاست کی ترقی اور عوامی مفاد کے تحفظ کے لیے اپنی آئینی ذمہ داریاں بھرپور انداز میں ادا کرے گی۔
انہوں نے کہا کہ میں ایک مرتبہ پھر چوہدری لطیف اکبر، چوہدری محمد سعید،راجہ مشتاق احمد منہاس اور چوہدری منظور احمد کو اس باوقار انتخاب پر صمیمِ قلب سے مبارکباد پیش کرتا ہوں اور دعاگو ہوں کہ اللہ تعالیٰ انہیں اپنی ذمہ داریاں احسن طریقے سے ادا کرنے، عوام کی توقعات پر پورا اترنے اور ریاست و قوم کی خدمت کا مزید موقع عطا فرمائے۔
بشکریہ: اے پی پی (ایسوسی ایٹڈ پریس آف پاکستان)
