کراچی۔ 01 نومبر (اے پی پی):پاکستان انجینئرنگ کونسل سندھ کے وائس چیئرمین انجینئر مختیار شیخ کی قیادت میں وفد نے سر سید یونیورسٹی آف انجینئرنگ اینڈ ٹیکنالوجی کے نئے وائس چانسلر پروفیسر ڈاکٹر محمد عامرسے ملاقات کی اور وائس چانسلر کا عہدہ سنبھالنے پر انہیں مبارکباد پیش کی۔اتوار کو جاری اعلامیہ کے مطابق وفد میں پاکستان انجینئرنگ کونسل کی گورننگ باڈی کے اراکین انجینئر محسن علی خان، انجینئر عبدالرحمن شیخ اور انجینئر وزیر شیخ شامل تھے جبکہ پی ای سی کے سینئر ایڈیشنل رجسٹرار انجینئر نیاز احمد بھی وفد کے ہمراہ تھے۔پاکستان انجینئرنگ کونسل کے نمائندوں نے انکی کامیابی و ترقی کیلئے نیک خواہشات کا اظہار کیا۔
انہوں نے اکیڈمک سیکٹر اوربالخصوص شعبہ انجینئرنگ میں ان کی طویل خدمات کو سراہا اور اس اعتماد کا اظہار کیا کہ پروفیسر ڈاکٹر عامر کی قیادت میں سرسید یونیورسٹی ترقی و معیار کی نئی بلندیوں پر پہنچے گی، تحقیقی کلچرکو فروغ ملے گا اور انجینئرنگ کے شعبے میں جامعہ کے روابط مزید مستحکم ہوں گے اورانہیں مزید تقویت ملے گی۔وائس چانسلر پروفیسر ڈاکٹر محمد عامر نے معیاری انجینئرنگ کی تعلیم کومعیاری بنانے، تحقیق اور جدت طرازی کو فروغ دینے، صنعت اور تعلیمی اداروں کے درمیان روابط بڑھانے اور اس بات کو یقینی بنانے کے عزم کا اعادہ کیا کہ سرسید یونیورسٹی کے فارغ التحصیل طلباء پیشہ ورانہ طور پراتنے بااعتماد اور باصلاحیت ہوں کہ ملک کی ابھرتی ہوئی ضروریات کو پورا کرسکیں اور عصرِ حاضر کے چیلنجزکا مقابلہ کرسکیں۔
اس ملاقات میں سرسید یونیورسٹی اور پاکستان انجینئرنگ کونسل کے مابین تعائون خاص طور پر انجینئرنگ کی تعلیم، پیشہ ورانہ ترقی، ایکریڈیٹیشن (منظوری/توثیق)، معیار میں بہتری اور صنعت کے ساتھ قریبی روابط جیسے شعبوں میں تعاون کو بڑھانے امکانات پر بھی تبادلہ خیال کیا گیا۔اس موقع پر سرسید یونیورسٹی کی جانب سے رجسٹرار لیفٹیننٹ کرنل (ر) جمشید علی، پروفیسر ڈاکٹر میر شبر علی، پروفیسر ڈاکٹر شاہینہ نور اور ڈاکٹر محمد کاشف شیخ بھی موجود تھے۔
بشکریہ: اے پی پی (ایسوسی ایٹڈ پریس آف پاکستان)



