اسلام آباد۔1اکتوبر (اے پی پی):وزیراعظم محمد شہباز شریف نےشہریوں کو ان کی دہلیز پر تیز، شفاف اور معیاری خدمات کی فراہمی کے عزم کا اعادہ کرتے ہوئے کہا ہے کہ عوام کو سرکاری خدمات کے حصول کے لیے دفاتر کے چکر لگانے کی ضرورت نہیں ہونی چاہیے،آسان خدمت مراکز کے ذریعے شہریوں کو ایک ہی چھت تلے متعدد سرکاری خدمات کی بروقت فراہمی حکومت کی اولین ترجیح ہے۔
جمعرات کو پی ایم آفس کے میڈیا ونگ سے جاری بیان کے مطابق وزیراعظم محمد شہباز شریف کی زیر صدارت اسلام آباد میں پاکستان آسان خدمت سینٹر کی کارکردگی، سینٹر کی توسیع اور ملک کے مختلف علاقوں میں پاکستان آسان خدمت سینٹرز کے قیام کے حوالے سے اجلاس ہوا۔
وزیراعظم نے پاکستان آسان خدمت سینٹر میں مختلف سہولیات کی فراہمی کے وقت میں مزید کمی لانے، پاکستان آسان خدمت سینٹر کی توسیع کا عمل تیز کرنے ،شہریوں کی ضرورت کے مطابق مختلف کائونٹرز پر عملے کی تعداد بڑھانے، آسان خدمت مرکز اسلام آباد کے تیسرے فریق سے کرائے گئے کارکردگی کی آڈٹ رپورٹ پیش کرنے، مظفرآباد، گلگت اور سکردو میں آسان خدمت مراکز پر جاری کام تیز کرنے اور ان سینٹرز کو جلد فعال کرنے، پشاور اور بنوں میں آسان خدمت مراکز کے قیام کے لیے فوری اقدامات شروع کرنے اور پشاور اور بنوں میں موجود وفاقی عمارتوں میں آسان خدمت مراکز کے قیام کا جامع منصوبہ جلد ازجلد پیش کرنے کی ہدایت کرتے ہوئے کہا کہ نجی شعبے کے ساتھ مل کر ملک کے دیگر علاقوں میں بھی آسان خدمت مراکز قائم کئے جائیں۔
اجلاس میں وزیراعظم کو آسان خدمت مرکز اسلام آباد کی توسیع، سینٹر میں فراہم کی جانے والی خدمات اور کارکردگی بارے بریفنگ دی گئی جس میں بتایا گیا کہ آسان خدمت مرکز اسلام آباد میں جنوری سے ستمبر تک ایک لاکھ 71 ہزار سے زائد درخواستوں پر کارروائی کی جاچکی ہے، خدمات پر 99.5 فیصد شہریوں نے اطمینان کا اظہار کیا،آسان خدمت مرکز اسلام آباد میں خدمات کی فراہمی کا اوسط وقت 3 سے 10 منٹ ہے۔اجلاس میں وزیراعظم کو گلگت بلتستان اور آزاد جموں و کشمیر میں پاکستان آسان خدمت سینٹرز کے قیام پر پیشرفت کے حوالے سے بھی آگاہ کیا گیا۔ وفاقی وزرا ڈاکٹر مصدق مسعود ملک، احد خان چیمہ، عطاء اللہ تارڑ، شزا فاطمہ خواجہ، طارق فضل چوہدری اور متعلقہ اداروں کے اعلیٰ افسران بھی اجلاس میں شریک تھے
بشکریہ: اے پی پی (ایسوسی ایٹڈ پریس آف پاکستان)
