کوئٹہ۔ 11 نومبر (اے پی پی):بلوچستان فوڈ اتھارٹی نے عوام کو معیاری اور محفوظ خوراک کی فراہمی یقینی بنانے کے لیے کوئٹہ، ڈیرہ مراد جمالی، لورالائی اور حب میں مختلف خوراک کے کاروباری مراکز کے خلاف کارروائیاں کرتے ہوئے مجموعی طور پر 11 مراکز کے مالکان کو جرمانے جبکہ متعدد مراکز کو اصلاحی نوٹسز جاری کئے ۔ترجمان بلوچستان فوڈ اتھارٹی کے مطابق بلوچستان فوڈ اتھارٹی کی فوڈ سیفٹی ٹیم نے ڈائریکٹر آپریشنز ہیڈکوارٹر کی ہدایات پر BUITEMS یونیورسٹی کوئٹہ میں قائم 7 کینٹینوں، ایک جوس کارنر اور ایک ٹک شاپ سمیت مجموعی طور پر 9 فوڈ یونٹس کا معائنہ کیا۔ اس دوران صفائی کے ناقص انتظامات، ملازمین کی ذاتی صفائی میں کوتاہی، حفاظتی لباس کی عدم دستیابی، ممنوعہ چائنیز نمک اور نان فوڈ گریڈ رنگ کے استعمال، غیر معیاری تیل، گندے ریفریجریٹرز، خوراک کو کھلا رکھنے اور مصالحہ جات کے نامناسب ذخیرے سمیت مختلف خلاف ورزیوں پر 6 کینٹینوں کو جرمانے کیے گئے۔اسی طرح ڈیرہ مراد جمالی کے مختلف علاقوں میں خوراک کے مراکز کی انسپیکشن کے دوران ایک ڈسٹری بیوٹر، ایک بیکنگ یونٹ اور ایک بریانی شاپ کے مالکان کو جرمانے کیے گئے جبکہ 4 مراکز کو اصلاحی نوٹسز جاری کیے گئے۔
کارروائی کے دوران صفائی کی ابتر صورتحال، ورکرز کی ذاتی صفائی میں غفلت، کھلے کوڑے دان، نکاسی آب کے ناقص انتظامات، مکھیوں کی بھرمار، بیکری مصنوعات پر تیاری اور ایکسپائری کی تاریخیں درج نہ ہونے، مٹھائیوں میں زردہ کلر اور ایکسپائرڈ تلبینہ کی موجودگی پر کارروائی عمل میں لائی گئی۔لورالائی میں بلوچستان فوڈ اتھارٹی حکام نے شہر کے مضافات میں قائم مختلف خوراک کے مراکز کا معائنہ کیا۔ معمولی نوعیت کی خلاف ورزیوں پر متعلقہ دکانداروں کو اصلاحی نوٹسز جاری کیے گئے جبکہ انہیں فوڈ سیفٹی کے مقررہ ایس او پیز سے آگاہ کرنے کے ساتھ فوڈ بزنس لائسنس کے حصول کی ہدایت بھی کی گئی۔ اس سلسلے میں دکانداروں کی سہولت کے لیے لائسنس فارم بھی فراہم کیے گئے۔ادھر حب شہر میں فوڈ سیفٹی ٹیم نے مختلف خوراک کے کاروباری مراکز کے علاوہ دو واٹر پیوریفکیشن پلانٹس کا معائنہ کیا، جہاں صفائی کے ناقص انتظامات، ورکرز کی ذاتی صفائی میں کوتاہی، فلٹرز کی تبدیلی کا ریکارڈ موجود نہ ہونے، پانی کی ٹینکیوں کی طویل عرصے سے صفائی نہ ہونے اور بلوچستان فوڈ اتھارٹی کے لائسنس کی عدم دستیابی پر دونوں پلانٹس کے مالکان کو جرمانے کیے گئے جبکہ دیگر مراکز کو معمولی نقائص پر اصلاحی نوٹسز جاری کیے گئے۔
بلوچستان فوڈ اتھارٹی حکام نے متعلقہ کاروباری مراکز کے مالکان کو صفائی اور حفظان صحت کے مقررہ معیار پر عملدرآمد، اشیائے خورونوش کے محفوظ ذخیرے اور فوڈ بزنس لائسنس کے حصول کی ہدایت کرتے ہوئے واضح کیا کہ عوام کی صحت سے متعلق معاملات میں غفلت برداشت نہیں کی جائے گی اور خلاف ورزیوں پر مزید قانونی کارروائی عمل میں لائی جائے گی۔
بشکریہ: اے پی پی (ایسوسی ایٹڈ پریس آف پاکستان)



